اسلام آباد۔19اکتوبر (اے پی پی) پاکستان سپیس اینڈ اپر ایٹماسفیئر ریسرچ کمیشن (سپارکو) ہک وݙا سنگِ میل پار کریندیں ہوئیں پاکستان دا پہلا ہائپرسپیکٹرل سیٹلائٹ (ایچ ایس ۔ون) چین دے سیٹلائٹ لانچ سینٹر توں کامیابی دے نال خلا اچ روانہ کر ݙتا۔ اتوار کوں وزارت خارجہ توں جاری تھیوݨ آلے بیان موجب ایچ ایس ۔ون جدید ہائپرسپیکٹرل امیجنگ ٹیکنالوجی نال لیس اے جو سینکڑاں باریک سپیکٹرل بینڈز دے ذریعے ڈیٹا حاصل کرݨ دی صلاحیت رکھیندے۔ اے صلاحیت زمین دے استعمال، نباتات دی صحت، آبی وسائل اتے شہری ترقی دی درست نگرانی اتے تجزیے کوں ممکن بݨیسی۔ اے سیٹلائٹ درست زرعی منصوبہ بندی، ماحولیاتی نگرانی، شہری منصوبہ بندی اتے قدرتی آفات نال نبڑݨ سویں اہم قومی شعبیاں اچ صلاحیتاں اچ نمایاں وادھا کریسی۔ ایں دے اعلیٰ معیار دے ڈیٹا نال وسائل دے چنڳے انتظام اتے پاکستان کوں موسمیاتی تبدیلیاں توں پیدا تھیوݨ آلے چیلنجز دا مقابلہ کرݨ اچ مدد مِلسی۔ ایچ ایس۔ ون ترقیاتی منصوبیاں، خاص کر چین۔پاکستان اقتصادی راہداری (سی پیک) دے تحت، زمینی خطرات دی نشاندہی اتے پائیدار انفراسٹرکچر دی ترقی اچ وی مددگار ثابت تھیسی۔ ایچ ایس-ون دی کامیاب لانچنگ پاکستان دے خلائی پروگرام اچ ہک اہم پیش رفت اے اتے اے سپارکو دے ایں عزم دی نویں بݨاوٹ اے جو او قومی ترقی کیتے خلائی ٹیکنالوجی کوں استعمال اچ گھن آوݨ کیتے پرعزم اے۔ اے کامیابی پاکستان اتے چین وچال پرامن خلائی تحقیق اتے ایں دے سماجی تے اقتصادی ترقی کیتے استعمال دے لمبے ویلھے دے تعاون دی وی عکاسی کریندی اے۔ نائب وزیرِ اعظم تے وزیرِ خارجہ سینیٹر محمد اسحاق ڈار ایچ ایس -ون منصوبے تے کَم کرݨ آلے پاکستان اتے چین دے سائنس داناں اتے تکنیکی ماہرین کوں سراہیا اتے انہاں دی پیشہ ورانہ مہارت، لَگن اتے شاندار تعاون کوں خراجِ تحسین پیش کیتے۔
