اسلام آباد۔12ستمبر(اے پی پی) وزیراعظم شہباز شریف آکھیے ٹی چوک فلائی اوور دا منصوبہ اسلام آباد، راولپنڈی اتے پاسے دے علاقیں دے شہریاں کیتے سنگ میل ثابت تھیسی، ریل کار دے مجوزہ منصوبے نال جاڑے شہراں دے لوکاں کوں مزید سہولتاں ملسن، ترقیاتی منصوبیں کوں پورا کرݨ اچ معیار اُتے کوئی سمجھوتہ نہ تھیسی ۔ اے ڳالھ انہاں جی ٹی روڈ، اسلام آباد ایکسپریس ہائی وے دے جنکشن (ٹی چوک) روات اُتے فلائی اوور دی تعمیر دا سنگ بنیاد رکھݨ دی تقریب توں خطاب کریندے آکھی۔ تقریب اچ وفاقی وزیراں، ارکان اسمبلی اتے وفاقی دارالحکومت دی انتظامیہ اتے سی ڈی اے سودھے متعلقہ محکمیں دے افسر وی موجود ہن۔ تقریب توں خطاب کریندے وزیراعظم ٹی چوک فلائی اوور منصوبے کوں خوش آئند قرار ݙیندے آکھیا جو اے منصوبہ اسلام آباد، راولپنڈی اتے پاسے دے علاقیں دے شہریاں کیتے سنگ میل ثابت تھیسی، ہک کلومیٹر دے فلائی اوور نال ایکسپریس وے اتے ٻئے علاقیں کوں ونڄݨ اچ سہولت ملسی ۔ انہاں ٹی چوک منصوبے کیتے وزیر داخلہ اتے سی ڈی اے حکام دیاں کوششاں دی تعریف کریندے آکھیا جو ترقیاتی منصوبیں کوں پورا کرݨ اچ معیار اُتے کوئی سمجھوتہ نہ کیتا ویسی۔ وزیراعظم آکھیا جو پاکستان 2027 اچ ایس سی او سمٹ دی میزبانی کریسی، ایس سی او سمٹ کیتے تیاریاں ہݨے توں کرݨیاں ہوسن۔ انہاں اسلام آباد کوں مزید سوہݨا بݨاوݨ دی ہدایت کریندے ݙسایا جو تاجکستان تحفے اچ مختلف قسماں دے ٻوٹے ݙتن جنہاں نال شہر دی خوبصورتی اچ ودھارا تھیسی، شاہراہ دستور کوں مزید سوہݨا بݨاوݨ کیتے کم جاری اے، کجھ ہفتے اچ شاہراہ دستور دے آسے پاسے سوہݨے پھل ݙیکھݨ کوں ملسن۔ وزیراعظم آکھیا جو وزیر داخلہ محسن نقوی اتے وزیر ریلوے حنیف عباسی پنڈی، اسلام آباد اچ سفری سہولت دے نویں منصوبے اُتے کم کریندے پئن، ریل کار دے مجوزہ منصوبے نال جاڑے شہراں دے لوکاں کوں مزید سہولتاں ملسن۔ وزیراعظم آکھیا جو میٹرو بس سروس دے علاوہ ماحولیاتی تحفظ کیتے ای وی ٹرانسپورٹ وی متعارف کرائی ڳئی اے۔ انہاں سی ڈی اے اتے ضلعی انتظامیہ دے حکام کوں بھرپور محنت دے نال جاڑے شہراں کوں ملاوݨ اتے شہر دی خوبصورتی اچ ودھارا اتے شہریاں کوں سہولتاں ݙیوݨ کیتے اقدامات دی ہدایت کیتی۔ ایں توں پہلے وزیراعظم تختی دی گھنڈ کھلائی کرتے منصوبے دا سنگ بنیاد رکھیا۔ وزیر داخلہ محسن نقوی تقریب توں خطاب کریندے آکھیا جو ایکسپریس وے کجھ مہینے پہلے پوری تھی چکی ہئی، ٹی چوک فلائی اوور منصوبے دا 150 ݙینھ اچ افتتاح تھی ویسی۔ انہاں آکھیا جو جیڑھے اہداف ݙتے ڳئے ہن انہاں کوں اعلیٰ معیار کوں ݙیکھدے پورا کیتا ویسی۔ وزیراعظم کوں منصوبے دے بارے اچ بریفنگ ݙیندے ݙسایا ڳیا جو ٹی چوک فلائی اوور منصوبے اُتے ہک ارب 49 کروڑ 50 لکھ روپے لاگت آسی اتے اے 150 ݙینھ دی گھٹ مدت اچ پورا تھی ویسی۔ اسلام آباد ایکسپریس وے وفاقی دارالحکومت دی اہم شاہراہ اے جیڑھی راولپنڈی، پنجاب، آزاد کشمیر اتے جی ٹی روڈ کوں آپس اچ ملیندی اے۔ سی ڈی اے پہلے ہی زیرو پوائنٹ توں ٹی چوک تئیں اسلام آباد ایکسپریس وے کوں سگنل فری بݨا ݙتے۔ جی ٹی روڈ ٹی چوک روات اسلام آباد ایکسپریس وے جنکشن، وفاقی دارالحکومت دا اہم داخلے دا راستہ اے، ایں ویلھے ایں جنکشن اُتے ٹریفک دا ٻہوں سارا دٻاؤ ہوندے اتے اے خراب صورتحال دا شکار اے، ہولی ٹریفک دے نال نال باری ٹریفک دا وی ایں اُتے شدید دٻاؤ اے۔ ایں صورتحال کوں ݙیکھدے سی ڈی اے منصوبے اُتے کم دا آغاز کیتے اتے سی ڈی اے اتے این ایچ اے وچال رائٹ آف وے دے مسئلے کوں حل کیتا ڳئے اتے 5 جون 2025 کوں این ایچ اے سی ڈی اے کوں این او سی جاری کیتا۔ ایں جنکشن توں روزانہ تقریباً ہک لکھ گاݙیاں دا گزر تھیندے، فلائی اوور دی تعمیر نال روزانہ تقریباً 41 ہزار 572 گاݙیاں کوں آوݨ ونڄݨ اچ سوکھ تھیسی ۔ لاہور اتے پنجاب دے ٻئے علاقیں توں اسلام آباد براہ راست جی ٹی روڈ آوݨ آلے مسافراں دی سہولت کیتے فلائی اوور دا ڈیزائن میسرز نیسپاک تیار کیتے۔ فلائی اوور دی لمبائی ہک کلومیٹر توں ودھ اتے ایں دی چوڑائی 11.30 میٹر ہوسی اتے ایں دے نال نال سٹریٹ لائٹس اتے ہارٹیکلچر دا وی انتظام کیتا ویسی۔
