لاہور۔13مئی(اے پی پی):وزیر اعظم محمد شہباز شریف جناح ہائوس،سی ایم ایچ تے سروسز ہسپتال دا دورہ کیتے ۔ایں موقع تے انہاں رے رلے نگران وزیر اعلی پنجاب محسن نقوی وی موجود ہن ۔وزیر اعظم سروسز ہسپتال اچ زیر علاج ڈی آئی جی علی ناصر رضوی سودھے ٻئے پولیس افسران و زخمی اہلکاراں دی عیادت کیتی تے ہسپتال انتظامیہ کوں زخمی تھیوݨ آلیں دے علاج کیتے بہترین طبی سہولتاں ݙیوݨ دی ہدایت کیتی ۔ ڈی آئی جی علی ناصر رضوی پی ٹی آئی کارکناں دے پتھراؤ توں زخمی تھئے ہن ۔ ایں موقع تے وزیر اعظم سرکاری املاک کوں ضیان پڄاوݨ دی شدید مذمت کریندے ہوئیں آکھیے پی ٹی آئی احتجاج دی آڑ اچ دہشت گردی کیتی اے ، اے دہشت گردی تے ملک دشمنی ہے جیں کوں کہیں صورت قبول نی کیتا ونڄ سڳدا، اینکوں آئینی تے جمہوری احتجاج نی آکھیا ونڄ سڳدا ۔
انہاں آکھیے بلوائیاں اتے سہولت کاراں دے خلاف کارروائیاں اچ کوئی رعایت نہ کیتی ویسی ،ہر حملہ آور دی شناخت کرتے قانون دے مطابق سزا ݙتی ویسی ۔ محمد شہباز شریف آکھیے ساڑو گھیراؤ کرتے سرکاری املاک کوں ضیان پڄاوݨ آلیں دے نال اوکھے ہتھاں نال نبڑیا ویسی ۔انہاں شہدا اتے غازیاں دی یاد گاراں ، حساس اداریں، عمارات اتے جناح ہائوس دی بے حرمتی دی شدید الفاظ اچ مذمت کیتی ۔
