اسلام آباد۔17مارچ (اے پی پی) وفاقی ویر قانون تے انصاف اعظم نذیر تارڑ آکھیا جو ملک کوں اڄوکے معاشی بحران توں کھݙھݨ کیتے ساری قیادت کوں سر جوڑ تے ٻہوݨا پوسی، معاشی معاملے بہتری دی بجائے ابتری آلے پاسے ونڄݨ لمحہ فکریہ اے۔ اپوزیشن کوں ہک واری ولا دعوت ݙیندوں جو ایں ملک دی عوام دی بہتری کیتے اساݙے نال رَل ٻہن۔ جمعہ کوں سینیٹ آف پاکستان دی گولڈن جوبلی تقریبات دے چھیکڑی ݙینھ ڳالھ مہاڑ کریندیں ہوئیں وفاقی وزیر قانون آکھیا جو ایں ایوان اچ ہر شعبہ زندگی توں لوکاں ولوں گولڈن جوبلی تقریبات اچ ڳالھ مہاڑ نال اگلی راہ متعین کرݨ اچ سوکھ تھیسی۔ ایں شاندار تقریب کراوݨ تے چیئرمین سینیٹ ، انہاں دی ٹیم ، سیکرٹری سینیٹ ، پروٹوکول سیکشن ، میڈیاسیکشن سودھے سارے مبارخ باد دے مستحق ہن۔ انہاں کوں خراج تحسین پیش کریندوں۔ انہاں آکھیا جو اتھ جتنے وی لوک شریک تھین انہاں دی ڳالھ مہاڑ دا محور پاکستان دی معاشی صورتحال رہی اے۔ سینیٹ وفاق پاکستان دی علامت اے ، ملک ایں ویلھے جیڑھے اوکھے دور توں لنڳھدا پے اتے جیڑھا سیاسی درجہ حرارت اے ایں تے وی ڳالھ تھیوݨی چاہیدی اے۔ ساری سیاسی قوتاں کوں سیاسی اتے معاشی استحکام کیتے اپݨا کرداد ادا کرݨا چاہیدے۔
