اسلام آباد ۔ 6 جنوری (اے پی پی)وزیراعظم عمران خان آکھیے جو منشیات اتے بالاں نال جنسی تشدد بہوں وڈا مسئلہ بنڑ گے ،اتے اے پاکستان کیتے شرم دی گال اے، انہاں مسلیں نال نبڑنڑ کہیں ہک ادارے یا محکمے دا کم کائنی بلکہ والدین ، استاد تے آئمہ کرام ،علما سمیت ساری قوم کوں رل تے ایندے خلاف کھڑے تھیونڑاں اے تے پورے معاشرے کوں اے جنگ جتنڑی اے ، او سنوار کوں انسداد منشیات کیتے ”زندگی“ ایپلی کیشن دی افتتاحی تقریب نال خطاب کریندے پئے ہن ، ایں موقع تے وزیر داخلہ بریگیڈیئر (ر) اعجاز احمد شاہ، وزیراعظم دی معاون خصوصی اطلاعات و نشریات ڈاکٹر فردوس عاشق اعوان، وزیر مملکت انسداد منشیات شہریار آفریدی اتے وزیراعظم دے معاون خصوصی صحت ڈاکٹر ظفر مرزا وی انہاں دے رلے ہن ۔ وزیراعظم منشیات دے خلاف موبائل ایپلی کیشن دی تیاری اتے آغاز تے متعلقہ اداریں کوں مبارخ ڈیندے ہوئیں آکھیے جو منشیات دا استعمال نینگر نسل کوں تباہ کریندا پئے ، انہاں آکھیے جو اے اساڈے معاشرے دا بہوں وڈا مسئلہ بنڑ گے لیکن بدقسمتی نال ایں حوالے نال عوام اچ شعور کائنی ، انہاں آکھیے جو منشیات دا استعمال پہلے صرف یونیورسٹیاں دے طالبیں اچ سنڑنڑ اچ آندا ہئی لیکن ہنڑ سکولاں اچ بال وی ایں لعنت اچ آندے پن ،انہاں آکھیا جو بالاں نال جنسی زیادتی دے ودھدے واقعات وی تباہ کن ہن ،اے وی بہوں وڈا مسئلہ اے ، شرم دے ماریے لوک ایندے تے گال نی کریندے ، اے مسئلہ ہک وبا دی صورت اچ کھنڈ گے اساڈی حکومت ایں حوالے نال کافی کم کیتے ،موبائل فون پاروں وی منشیات تے بالاں نال جنسی زیادتی اچ ودھارا تھیندا پئے تے معاشرے اچ تباہی کھنڈدی پئی اے ،ایں ساری صورت حال نبڑنڑ کیتے ہنگامی بنیاداں تے اقدامات کرنڑیںہوسن ، اے این ایف پولیس سمیت کہیں ہک محکمے دا کم کائنی ساری قوم کوں رل تے ایندے خلاف کٹھا تھیونڑاں پوسی کیوں جو جڈاں کوئی قوم فیصلہ کر گھندی اے او کم ممکن تھی ویندے ۔
