لاہور۔28اگست (اے پی پی) پنجاب دے ٻہوں سارے ضلعیں اچ آندے چووی گھنٹے اچ ٻیا مینھ وسݨ دا امکان اے ۔ مینھ وسݨ ویلھے آسمانی بجلی ڈھݨ پاروں ھک شہری جاں بحق ،5 زخمی جݙاں جو 45 جانور مرڳئن ۔ ترجمان پی ڈی ایم اے پنجاب موجب گزریل 24گھنٹے خانیوال اچ 48 ملی میٹر ،چکوال اچ 45 ،بہاولپور اچ 30، کوٹ ادو اچ 42، ساہیوال اچ 33 اتے بہاولنگر اچ 44 ملی میٹر مینھ ریکارڈ کیتا ڳئے جݙاں جو لاہور ،ملتان، جہلم ، قصور، بھکر، گجرات، ٹوبہ ٹیک سنگھ ،سرگودھا اتے حافظ آباد اچ زور دا مینھ وٹھے ۔ ترجمان موجب آندے 24 گھنٹے پنجاب دے ٻہوں ضلعیں اچ زور دا مینھ وسݨ دا امکان اے تے ساوݨ دے مینھ دا اے سیپل 31 اگست تئیں جاری رہسی ۔ ڈی جی پی ڈی ایم اے پنجاب عرفان علی کاٹھیا صوبے دے ڈپٹی کمشنرزکوں الرٹ رہݨ دی ہدایت کریندے آکھیے ہنگامی صورتحال نال نبݨݨ سانڳے متعلقہ محکمے الرٹ رہن،زور دا مینھ وسݨ /واچھڑ پاروں وݙے شہراں اچ اربن و فلیش فلڈنگ دا ݙر اے۔ڈی جی پی ڈی ایم اے موجب پنجاب دے سارے دریا تے ندی نالیں اچ پاݨی معمول دے مطابق وہندا پئے ،دریائے سندھ اچ تربیلا دی جاہ تے تلویں درجے دی چھل اے جݙاں جو31 اگست تئیں ڈیرہ غازی خان و راجن پوررود کوہیاں اچ چھل دے ریلے دا ݙر اے ۔ پی ڈی ایم اے کنٹرول روم اچ صورتحال دی مانیٹرنگ مسلسل جاری اے۔ڈی جی آکھیے ریسکیو 1122 سودھے ٻئے ریسکیو ادارے مشینری سودھے عملہ الرٹ رکھن،نشیبی علاقیں کوں پاݨی کڈھیا ونڄے ، شہری احتیاط ورتن، بجلی دے کھمبیں تے لڑکدیاں تاراں توں ھک پاسے رہن۔ عرفان علی کاٹھیا آکھیے عوام کچے مکان تے پراݨیاں عمارتاں توں ھک پاسے رہن ںکے ٻالیں دا خیال رکھن، انھاں کوں پاݨی آلی جاہ تے اصلوں نہ ونڄݨ ݙیون تے ہنگامی صورت حال اچ پی ڈی ایم اے دی ہیلپ لائن 1129 تے کال کرن
