لاہور۔ 14جنوری (اے پی پی):پنجاب دی تاریخ اچ پہلی واری ڈویژن، ڈسٹرکٹ اتے تحصیل سطح تے قائم پریس کلباں اچ 9 کروڑ 45 لکھ روپے دی خطیر گرانٹ ونڈ ݙتی ڳئی ۔ ایں ضمن اچ اتوار کوں پریس کلباں اچ سپیشل گرانٹ دے چیک ونڈݨ دی تقریب تھئی جیں اچ نگران وزیراعلیٰ پنجاب محسن نقوی، نگران وفاقی وزیر اطلاعات مرتضیٰ سولنگی اتے صوبائی وزیر اطلاعات عامر میر سودھے پریس کلباں دے عہدیداران اتے صحافیاں دی وݙی تعداد شرکت کیتی۔ تقریب توں خطاب کریندے ہوئیں وزیراعلیٰ پنجاب محسن نقوی آکھیے جو پروفیشنل جرنلسٹس دی فلاح و بہبود حکومت دی ذمہ واری اے، ھک صحافی دی حیثیت نال اساں تے ٻہوں فرائض لاگو تھیندن ۔ انہاں آکھیے صحافی ذمہ واری نال آپݨے فرائض انجام ݙیندے پئن ، ساݙی خواہش اے جو صحافت دا معیار اُچا ہووے ۔ وزیراعلیٰ پنجاب آکھیے جو صحافیاں کوں جدید دور دے تقاضیں موجب تربیت دی فراہمی ناگزیر اے۔ وزیراعلیٰ پنجاب پریس کلباں دی آمدݨ دے ذرائع ودھاوݨ تے زور ݙیندے ہوئیں آکھیے جو او ایجھے اقدامات چاون جنھاں توں انہاں دے ریونیو اچ وی ودھارا تھیوے ۔ ایں موقع تے خطاب کریندے ہوئیں وفاقی وزیر اطلاعات مرتضیٰ سولنگی آکھیے پریس کلب آزادی صحافت دا اہم ستون ہن، صحافی معاشرے دا اہم حصہ ہن۔ انہاں آکھیے وزیراعلیٰ پنجاب پریس کلباں کیتے 9 کروڑ 45 لکھ روپے دی خطیر گرانٹ منظور کیتی جیں تے حکومت پاکستان اتے وزارت اطلاعات انہاں دے مشکور ہن ، انہاں آکھیے وزیراعلیٰ پنجاب محسن نقوی ہمیشہ عوامی ضرورتاں دا خیال رکھیے ، عوامی خدمت اچ و ہر ویلھے مصروف عمل رہندن ۔تقریب توں خطاب کریندے ہوئیں صوبائی وزیر اطلاعات عامر میر آکھیے وزیراعلیٰ پنجاب صحافی برادری دی فلاح و بہبود دا ہمیشہ خیال رکھیے۔
