اسلام آباد۔13ستمبر (اے پی پی) وزیراعظم محمد شہباز شریف آکھیا جو قابل تجدید توانائی ای پاکستان دا مستقبل اے، متبادل توانائی نال بجلی ٻݨائی ونڄ سڳدی اے۔ وزیراعظم آفس میڈیا ونگ توں جاری بیان دے مطابق وزیراعظم اے ڳالھیں منگل کوں چینی کمپنی زونرجی دے وفد نال ڳالھ مہاڑ کریندیں ہوئیں آکھی۔ وفد دی قیادت ایگزیکٹو ڈائریکٹر اتے صدر زونرجی کارپوریشن رچرڈ جے گاؤ کیتی۔ وزیراعظم آکھیا جو پاکستان دے درآمدی بل دا وݙا حصہ بجلی ٻݨاوݨ کیتے مہانگا ایندھن درآمد کرݨ اچ خرچ تھی ویندے۔ ایں زرمبادلہ کوں بچاوݨ کیتے ضروری اے جو اساں قابل تجدید توانائی آلے پاسے ونڄوں۔ انہاں آکھیا جو شمسی توانائی منصوبیاں بارے بدھ کوں ہک پری بڈنگ کانفرنس اسلام آباد اچ تھیندی پئی اے۔ وزیراعظم آکھیا جو پاکستان اتے چین چنڳے دوست ہن، چین ہر داخلی اتے خارجی محاذ تے پاکستان دی حمایت کیتی اتے چین پاکستان اقتصادی راہداری جو چین دے وسیع تر منصوبے بیلٹ اینڈ روڈ انیشیٹو دا حصہ اے دے ذریعے چین پاکستان اچ انفراسٹرکچر دی تعمیر، صنعت اتے مختلف شعبیاں اچ سرمایہ کاری کریندا پئے۔ ملاقا ت اچ وفاقی وزیر برائے سرمایہ کاری بورڈ چوہدری سالک حسین، وفاقی وزیر برائے منصوبہ بندی احسن اقبال، وفاقی وزیر برائے توانائی انجینئر خرم دستگیر، وفاقی وزیر قانون اعظم نذیر تارڑ، وزیراعظم دے معاونین خصوصی ڈاکٹر جہانزیب خان، ظفرالدین محمود اتے فہد حسین شرکت کیتی۔ زونرجی کارپوریشن ولوں وزیراعظم کوں فلڈ ریلیف فنڈ کیتے ہک وݙی رقم دا چیک وی عطیہ کیتا ڳیا۔
