اسلام آباد۔24مئی(اے پی پی)وزیراعظم شہباز شریف دی اڳواݨی اچ وفاقی کابینہ دا اجلاس تھئے جیندے اچ پی ٹی آئی دا لانگ مارچ ہر صورت روکݨ دا فیصلہ تھئے جو امن و امان یقینی ٻݨایا ویسی، کہیں کوں اسلام آباد بند کرݨ دی اجازت نہ ݙتی ویسی۔ کابینہ دا آکھݨ ہا جو امن و امان خراب کرݨ آلیاں دے خلاف کاروائی کیتی ویسی ایں دھرنے نال معیشت خراب تھیسی اتے ݙیہاڑی دار مزدور متاثر تھیسی۔ کابینہ اجلاس دے بعد وزیر داخلہ رانا ثنا اللہ وفاقی ورزاء اتے ٻئے اتحادی جماعتاں نال پریس کانفرنس کریندے آکھیے جو پی ٹی آئی ہݨ ڳالھیں توں گولیاں تے آگئی اے، پی ٹی آئی دی لیڈرشپ پشاور اچ ڳئی ٻیٹھی اے، اے لوک قوم کوں گمراہ اتے تقسیم کرݨ چاہندن، جیکر پی ٹی آئی ایکوں خونی احتجاج نا آہدی تاں اساں وی رکاوٹ نہ بݨدے۔ انہاں آکھیا جو کابینہ فتنہ اتے فساد دی اجازت نہ ݙیوݨ دا فیصلہ کیتے، مارچ دی اݙ اچ ملک اچ خانہ جنگی دی سازش نہ تھیوݨ ݙتی ویسی۔ حکومت عوام دے جان ومال دی حفاظت دا فرض پورا کریسی۔ ایں موقع تے پاکستان پیپلز پارٹی دے رہنما قمرزمان کائرہ آکھیا جو حکومت کہیں ہک جماعت دی نئیں، اساں ملک و قوم دے نفع ونقصان دے ذمہ دار ہین۔ جے یو آئی رہنما اسد محمود آکھیا جو عمران خان ڄڳ کوں اے ثابت کرݨ چاہندن جو اتھاں بے یقینی دی صورتحال اے۔
